Kollej va texnikumlarda o‘qishni xohlovchilarga qo‘shimcha imkoniyatlar berilmoqda

Ota-onalar va abituriyentlarning murojaatlarini inobatga olib, shuningdek, yoshlarni qo‘llab-quvvatlash maqsadida, 2024/2025-o‘quv yili uchun kollej va texnikumlarga qabul qilish bo‘yicha qo‘shimcha imkoniyatlar taqdim etilmoqda.

Buning uchun 25-sentyabrga qadar my.uzbmb.uz sayti orqali onlayn yoki bevosita ta’lim muassasasiga murojaat qilish lozim.

Quyidagi imkoniyatlar taqdim etiladi:

Bo‘sh o‘rinlari mavjud bo‘lgan kollej va texnikumlarga abituriyentlar test natijalari asosida ikkita mutaxassislik fani bo‘yicha tegishli kasbni tanlashlari mumkin.

Abituriyentlar ta’lim tilini o‘zgartirgan holda kollej va texnikumlarning tegishli kasb va mutaxassisliklarini tanlashlari mumkin.

Dual ta’lim shakli bo‘yicha abituriyentlar ish beruvchilar bilan tuzilgan shartnoma asosida to‘g‘ridan-to‘g‘ri kollej va texnikumlarga qabul qilinadi.

My.uzbmb.uz elektron platformasi orqali ro‘yxatdan o‘tmagan abituriyentlar kechki yoki sirtqi ta’lim shaklida yozma imtihonlar orqali to‘lov-kontrakt asosida o‘qishga qabul qilinadilar.

Diqqat! Kollej/texnikumlarning kunduzgi ta’lim shakli uchun my.uzbmb.uz sayti orqali onlayn murojaat qilish, kechki va sirtqi ta’lim shakllari uchun esa bevosita ta’lim muassasasiga murojaat qilish lozim.

Shu bilan birga, kollej va texnikumlarning 1-kurslari uchun o‘quv jarayoni 2024-yil 2-oktyabrdan boshlanadi.