Yangi davr bunyodkorlari uchun yangi mukofot: “Yangi O‘zbekiston bunyodkorlari” ko‘krak nishoni ta’sis etildi

O‘zbekiston Respublikasi Vazirlar Mahkamasining 2026-yil 19-fevraldagi 68-sonli qarori bilan mamlakatimiz taraqqiyotiga munosib hissa qo‘shayotgan tashabbuskor yoshlarni taqdirlash maqsadida “Yangi O‘zbekiston bunyodkorlari” ko‘krak nishoni ta’sis etildi.

Mazkur mukofot Yangi O‘zbekistonni barpo etish yo‘lida faol fuqarolik pozitsiyasi, zamonaviy bilimi, vatanparvarligi va innovatsion g‘oyalari bilan ajralib turgan fuqarolarni rag‘batlantirishga xizmat qiladi.

Mukofot bilan kimlar taqdirlanadi?

Ko‘krak nishoni bilan nafaqat O‘zbekiston Respublikasi fuqarolari, balki mamlakatimiz nufuzini oshirishda jonbozlik ko‘rsatayotgan chet el fuqarolari va fuqaroligi bo‘lmagan shaxslar ham taqdirlanishi mumkin.

Nomzodlar quyidagi toifalardan saralab olinadi:

• “El-yurt umidi” jamg‘armasi stipendiatlari;

• Prezident maktablari va “Yangi O‘zbekiston” universiteti bitiruvchilari;

• “Prezident iqtidorli farzandlari” tashabbusi ishtirokchilari;

• Xalqaro tashkilotlar va nufuzli xorijiy OTMlarda tajriba orttirgan iqtidorli vatandoshlar.

Saralash va taqdirlash tartibi

Mukofotlash jarayoni shaffoflik va xolislik tamoyillari asosida, bir necha bosqichda amalga oshiriladi:

1. Hujjatlarni qabul qilish: Taqdimnomalar har yilning 1-martiga qadar Maktabgacha va maktab ta’limi vazirligiga (ishchi organ) taqdim etiladi.

2. Ishchi guruh o‘rganishi: 9 kishidan iborat maxsus guruh nomzodlarning hujjatlarini o‘rganib, 25-martga qadar xulosa tayyorlaydi.

3. Yakuniy qaror: Respublika komissiyasi nomzodlar faoliyatini atroflicha ko‘rib chiqib, 20-mayga qadar taqdirlash to‘g‘risida yakuniy qaror qabul qiladi.

Nomzodlarga qo‘yiladigan asosiy mezonlar

Nomzodlarni baholashda ularning quyidagi yo‘nalishlardagi natijalari inobatga olinadi:

• Davlat dasturlari va strategik loyihalarni amalga oshirishdagi ishtiroki;

• Ilmiy-innovatsion loyihalar va kreativ g‘oyalar orqali mamlakat nufuzini oshirishga qo‘shgan hissasi;

• Iqtisodiy, ijtimoiy va ekologik muammolarni hal qilishdagi tashabbuskorligi;

• Ilg‘or xorijiy tajribalarni o‘rganib, yurtimiz ravnaqi yo‘lida tatbiq etganligi;

• Namunali xulq-atvori va fidoyiligi.

Topshirish marosimi

Ko‘krak nishoni va uning guvohnomasi har yili Iqtidorli yoshlarni qo‘llab-quvvatlash jamiyati qurultoyida tantanali ravishda topshiriladi.

Eslatma: Bir shaxs mazkur ko‘krak nishoni bilan faqat bir marta taqdirlanadi. Mukofot davlat mukofotlaridan keyin ko‘krakning chap tomoniga taqiladi.

Taqdirlanganlar ro‘yxati vakolatli organlarning rasmiy veb-saytlari va ommaviy axborot vositalarida keng e’lon qilib boriladi.