Akademik litseylarga qabul boshlandi: Hujjat topshirish tartibi, kvotalar va imtihon fanlari ma’lum bo‘ldi

Bugun, 10-iyun sanasidan boshlab respublikadagi akademik litseylarga 2026/2027-o‘quv yili uchun talabgorlarni onlayn ro‘yxatga olish jarayonlariga start berildi. Qabul kampaniyasi 10-iyulga qadar (shu kuni ham) davom etadi.

Barcha arizalar Yagona ta’lim xizmatlari portali — my.edu.uz orqali elektron shaklda qabul qilinadi.

Ro‘yxatdan o‘tish uchun qanday hujjatlar talab etiladi?

Talabgorlar platformada ro‘yxatdan o‘tishda o‘zlarining ID-karta yoki tug‘ilganlik to‘g‘risidagi guvohnoma ma’lumotlarini kiritadilar. Shuningdek, tizimga quyidagi hujjatlarni elektron formatda (PDF yoki JPEG) yuklash lozim:

• Fotosurat: 3,5×4,5 sm o‘lchamdagi 1 ta rangli rasm;

• Imtiyoz hujjatlari (agar mavjud bo‘lsa): Fan olimpiadalari g‘olibligini tasdiqlovchi diplom, chet tili yoki umumta’lim fanlaridan milliy va xalqaro sertifikatlar.

Muhim jihati: Tizimga kiritilgan shaxsiy ma’lumotlar inson omilisiz, avtomatik ravishda tekshiriladi. Tug‘ilganlik haqidagi ma’lumotlar FHDYO organlari bazasidan, maktabni bitirganlik to‘g‘risidagi ma’lumotlar esa Maktabgacha va maktab ta’limi vazirligining e-shahodatnoma.uz tizimidan integratsiya orqali olinadi.

Abituriyentlarga qanday imkoniyatlar beriladi?

1. 3 tagacha litsey tanlash imkoniyati: Ro‘yxatdan o‘tish jarayonida o‘quvchilar uchtagacha akademik litseyni tanlashlari mumkin.

2. Yagona til qoidasi: Har bir litseyda ta’lim tili bir xil bo‘lgan bittadan yo‘nalish tanlanadi. Ya’ni, tanlangan barcha litseylarda ta’lim tili (masalan, o‘zbek yoki rus tili) bir xil bo‘lishi shart.

3. Hudud va chet tilini tanlash: Talabgorlar imtihonda qaysi chet tilidan test topshirishlarini o‘zlari belgilaydilar va o‘zlari tanlagan hududda tashkil etiladigan test sinovlarida ishtirok etishadi.

Qabul kvotalari: Qaysi tillarga qancha o‘rin ajratilgan?

2026/2027-o‘quv yili uchun respublika bo‘yicha jami 69 ta akademik litseyga 14 898 ta kvota ajratilgan. Kvotalarning tillar kesimidagi taqsimoti quyidagicha:

• 🇺🇿 O‘zbek tili — 12 116 ta o‘rin;

• 🇷🇺 Rus tili — 2 340 ta o‘rin;

• 🇺🇿 Qoraqalpoq tili — 442 ta o‘rin.

Imtihon formati: Savollar soni va baholash mezonlari

Yangi o‘quv yili uchun akademik litseylarning ta’lim yo‘nalishlariga mos keluvchi test sinovi o‘tkaziladigan fanlar majmuasi va baholash mezonlari tasdiqlandi.

Barcha yo‘nalishlar uchun test topshiriqlarining umumiy soni 60 tani tashkil etadi:

• 20 ta savol — o‘quvchining intellektual qobiliyat darajasi (IQ)ni aniqlash uchun;

• 40 ta savol — talabgor tanlagan yo‘nalishga mos keladigan ikkita mutaxassislik fani bo‘yicha (har bir fandan 20 tadan).