O‘qishini ko‘chirgan talabalarni HEMIS tizimiga kiritish imkoniyati yaratildi
Oliy ta’lim jarayonlarini boshqarish axborot tizimi (HEMIS) imkoniyatlari yanada kengaytirildi. Endilikda xorijiy yoki respublikaning boshqa OTMlaridan o‘qishini ko‘chirgan (transfer) hamda o‘qishini tiklagan talabalarni tizimga kiritish va ular bo‘yicha ta’lim buyruqlarini rasmiylashtirish funksionali ishga tushirildi.
Transfer tizimi orqali ijobiy javob olgan talabalarni tizimga kiritish endi mas’ullar uchun ochiq.
Jarayon qanday amalga oshiriladi? (Bosqichma-bosqich qo‘llanma)
Talabani HEMIS tizimiga muvaffaqiyatli kiritish uchun quyidagi ketma-ketlikni bajaring:
1-qadam. Farmoyish yaratish
“Ta’lim buyruqlari” menyusiga kiring va “Darslarga ruxsat berish (perevod)” turidagi yangi farmoyishni shakllantiring.
2-qadam. Anketa ma’lumotlarini to‘ldirish
“Talabalar bazasi” menyusiga o‘ting va “Perevodni kiritish” tugmasini bosing. Ochilgan anketada quyidagilarni ko‘rsating:
-
Tegishli farmoyish raqami;
-
Ko‘chirish turi;
-
Avval o‘qigan davlati yoki ta’lim muassasasi nomi.
3-qadam. Guruh va o‘quv rejaga biriktirish
Farmoyishning “Talaba qo‘shish” qismida talabani tegishli o‘quv reja, semestr va guruhga biriktiring.
4-qadam. ERI orqali tasdiqlash
“E-hujjatlar / Hujjatni imzolash” menyusi orqali yaratilgan farmoyish mas’ul shaxslarning elektron raqamli imzosi (ERI) bilan tasdiqlanishi lozim.
5-qadam. Yakunlash
“Ta’lim buyruqlari” sahifasida farmoyishni “Bajarish” holatiga o‘tkazing. Shundan so‘ng talaba avtomatik ravishda tegishli guruh ro‘yxatida aks etadi.
Muhim talablar va cheklovlar
Tizimda xatoliklar yuzaga kelmasligi uchun quyidagi shartlarga e’tibor bering:
-
O‘quv rejasi: Talaba biriktirilayotgan o‘quv rejaning o‘quv yili joriy o‘quv yiliga teng yoki undan kichik bo‘lishi hamda o‘quv reja tizimda tasdiqlangan bo‘lishi shart.
-
Talabaning holati: O‘qishni ko‘chirib kelayotgan talaba avvalgi oliy ta’lim muassasasidan chiqarilgan (chetlatilgan) bo‘lishi shart. Agar talaba eski OTM bazasida hali ham "faol" bo‘lib tursa, uni yangi tizimga kiritish imkoni bo‘lmaydi.
Eslatma: Tizim bilan bog‘liq texnik savollar tug‘ilganda, vazirlikning HEMIS bo‘yicha texnik qo‘llab-quvvatlash guruhiga murojaat qilishingiz tavsiya etiladi.