O‘zbekistonda “Eng yaxshi huquq o‘qituvchisi” respublika ko‘rik-tanlovi start olmoqda

Adliya vazirligi hamda Maktabgacha va maktab ta’limi vazirligi hamkorligida 2026-yilning mart–may oylari davomida umumiy o‘rta ta’lim maktablarining “Davlat va huquq asoslari” fani o‘qituvchilari o‘rtasida “Eng yaxshi huquq o‘qituvchisi” respublika ko‘rik-tanlovi o‘tkaziladi.

Mazkur tanlov Vazirlar Mahkamasining 2024-yil 24-avgustdagi 532-son qarori ijrosini ta’minlash, pedagoglarning kasbiy mahoratini oshirish va huquqiy ta’lim sifatini yaxshilash maqsadida tashkil etilmoqda.

Tanlov bosqichlari va muddatlari

Ko‘rik-tanlov an’anaviy tarzda uch bosqichda bo‘lib o‘tadi:

1. Tuman (shahar) bosqichi — mart oyida;

2. Hududiy bosqich (viloyatlar, Toshkent shahri va Qoraqalpog‘iston Respublikasi) — aprel oyida;

3. Respublika bosqichi — may oyida.

Ishtirok etish shartlari

Tanlov davomida ishtirokchilarning bilimi va pedagogik mahorati uchta asosiy shart bo‘yicha baholanadi:

• 1-shart: Test sinovi (eng yuqori natija ko‘rsatgan 20 nafar ishtirokchi keyingi bosqichga o‘tadi).

• 2-shart: Blits savol-javoblar (huquqiy bilimlar tezkorlik bilan sinovdan o‘tkaziladi).

• 3-shart: Taqdimot (pedagogik yondashuv va dars o‘tish metodikasi taqdim etiladi).

Har bir bosqich yakuniga ko‘ra, eng yuqori ball to‘plagan 3 nafar ishtirokchi keyingi bosqich yo‘llanmasini qo‘lga kiritadi.

G‘oliblarni rag‘batlantirish

Respublika bosqichi g‘oliblari diplom va quyidagi miqdordagi pul mukofotlari bilan taqdirlanadi:

• 1-o‘rin — 30 million so‘m;

• 2-o‘rin — 20 million so‘m;

• 3-o‘rin — 10 million so‘m.

O‘tgan yilgi natijalar haqida

Ma’lumot uchun, 2025-yilda o‘tkazilgan tanlovda respublika bo‘yicha 10 mingga yaqin o‘qituvchi ishtirok etgan. Yakuniy bosqichda Samarqand viloyati vakili Odilova Dilobar (1-o‘rin), buxorolik Norova Mehriniso (2-o‘rin) va qoraqalpog‘istonlik Baymuratov Azat (3-o‘rin) g‘oliblikni qo‘lga kiritgan edi.

Eslatma: Tanlovda ishtirok etish istagida bo‘lgan barcha “Davlat va huquq asoslari” fani o‘qituvchilari o‘zlari faoliyat yuritayotgan hududdagi maktabgacha va maktab ta’limi bo‘limlariga murojaat qilishlari mumkin.