Sirtqi ta’limga qabul 2025/2026-yildan butunlay to‘xtatildi

Prezident farmoniga ko‘ra, 2025/2026-o‘quv yilidan boshlab O‘zbekiston oliy ta’lim tizimida sirtqi shaklda o‘qishga qabul to‘liq to‘xtatildi. Bu qaror barcha davlat va nodavlat oliygohlarga teng tatbiq etiladi.

Endilikda nimalar o‘zgaradi?

Hech qaysi yo‘nalish bo‘yicha sirtqi ta’limga qabul qilinmaydi. Bu ta’lim shakli butunlay yopildi.

Yangi abituriyentlar uchun sirtqi ta’lim kvotalari ajratilmaydi.

Oliy ta’lim muassasalari kunduzgi, masofaviy yoki maqbullashtirilgan (part-time) ta’lim shakllari orqali o‘qitishni davom ettiradi.

Barcha o‘zgarishlar 2025/2026-o‘quv yilidan kuchga kiradi.

Kimlar o‘qishni davom ettiradi?

Sirtqi ta’limda hozirda tahsil olayotgan talabalar (yuqori bosqichdagilar) o‘z o‘qishlarini avvalgidek davom ettirishadi.

Faqat yangi talabalar uchun sirtqi shaklga qabul yopildi.

Sirtqining o‘rniga nima bo‘ladi?

Masofaviy ta’lim shakli kengaytiriladi.

Maqbullashtirilgan kunduzgi ta’lim (part-time education) joriy etiladi.

Magistraturada endilikda masofaviy o‘qitishga ruxsat beriladi (ilgari faqat kunduzgi edi).

Biroq muqobil ta’lim shakllari uchun qabul kunduzgi qabulning 50% dan oshmasligi kerak.

Masalan, agar oliygoh kunduzgi bo‘limga 100 nafar talaba qabul qilsa, muqobil (masofaviy yoki part-time) shakllarda o‘qishga 50 nafargacha talabani qabul qilishi mumkin.