“Turon” teatr tanlovining Respublika bosqichi o‘tkazilish sanasi va manzili belgilandi
Ixtisoslashtirilgan ta’lim muassasalari agentligi tizimidagi Prezident, ijod, sport hamda ixtisoslashtirilgan maktab va maktab-internatlari o‘quvchilari o‘rtasida o‘tkazilayotgan “Turon” teatr tanlovi o‘zining yakuniy bosqichiga yetdi. Mazkur nufuzli ijodiy bellashuvning respublika bosqichi joriy yilning 25–26-mart kunlari Toshkent shahrida bo‘lib o‘tadi.
Tanlovning maqsadi va ahamiyati
“Teatr – ibratxonadir” shiori ostida tashkil etilayotgan ushbu tanlov yosh avlodning intellektual salohiyatini oshirish, ularning sahnadagi mahoratini namoyon etish hamda yoshlarda vatanparvarlik va badiiy tafakkurni shakllantirishga xizmat qiladi. Hududiy saralash bosqichlarida g‘oliblikni qo‘lga kiritgan eng iqtidorli jamoalar poytaxt sahnasida o‘zlarining sahna madaniyati va ijodiy yondashuvlarini namoyish etadilar.
Ishtirok etish tartibi
Tanlovda agentlik tizimidagi umumiy o‘rta ta’lim maktablarining 7–10-sinf o‘quvchilaridan tarkib topgan (8 nafardan oshmagan) jamoalar ishtirok etadi. Ishtirokchi jamoalar tanlovning rasmiy platformasi (turonteatri.uz) orqali onlayn ro‘yxatdan o‘tgan bo‘lib, bellashuvlar uch bosqichda tashkil etilgan.
Tadbir Muqimiy nomidagi O‘zbekiston davlat musiqali drama teatri binosida bo‘lib o‘tishi belgilangan.
G‘oliblarni rag‘batlantirish
Respublika bosqichi yakunlariga ko‘ra g‘olib va sovrindorlar quyidagi tartibda taqdirlanadi:
-
1-o‘rinni egallagan jamoa a’zolari xorijiy mamlakatga tajriba orttirish yo‘llanmasi bilan mukofotlanadi;
-
2- va 3-o‘rin sohiblariga esa o‘zlari tahsil olayotgan maktabning faollar zali uchun zamonaviy interaktiv doskalar taqdim etiladi.
Shaffoflikni ta’minlash va apellyatsiya tartibi
Tanlov natijalarining xolisligini ta’minlash maqsadida uch kishidan iborat Apellyatsiya komissiyasi faoliyat yuritadi. Natijalardan norozi bo‘lgan ishtirokchilar tanlov yakuni e’lon qilingan vaqtdan boshlab 15 daqiqa ichida murojaat qilishlari lozim. Shikoyatlar komissiya tomonidan 1 soat muddat ichida ko‘rib chiqiladi va asoslantirilgan javob taqdim etiladi.