2026-yilda 1 900 nafar pedagog Vazir jamgʻarmasi ustamasini oladi: Kvotalar taqsimoti belgilandi

Maktabgacha va maktab taʼlimi vazirining tegishli buyrugʻi bilan 2026-yilda Vazir jamgʻarmasi hisobidan har oylik ustama toʻlanadigan malakali pedagog kadrlarning cheklangan soni va taqsimoti tasdiqlandi. Unga koʻra, joriy yilda jami 1 900 nafar pedagog kadrlarga ustama berilishi koʻzda tutilgan.

Kvotalarning sohalar boʻyicha taqsimlanishi

Vazir jamgʻarmasi mablagʻlari hisobidan qoʻshimcha moddiy ragʻbatlantiriladigan pedagoglar soni muassasa turlariga koʻra quyidagicha belgilandi:

• 1 400 ta oʻrin — umumiy oʻrta taʼlim muassasalari oʻqituvchilari uchun;

• 400 ta oʻrin — maktabgacha taʼlim tashkilotlari tarbiyachilari uchun;

• 100 ta oʻrin — Ixtisoslashtirilgan taʼlim muassasalari agentligi tasarrufidagi maktablar oʻqituvchilari uchun.

Mazkur kvotalar Qoraqalpogʻiston Respublikasi, viloyatlar va Toshkent shahri kesimida taqsimlangan boʻlib, "Maktabgacha taʼlim", "Boshlangʻich taʼlim", "Filologiya fanlari", "Ijtimoiy fanlar", "Aniq fanlar", "Tabiiy va iqtisodiy fanlar" hamda "Amaliy fanlar" yoʻnalishlarini qamrab oladi.

Saralash tartibi va muddatlari

Vazirlar Mahkamasining 2022-yil 2-avgustdagi qarori bilan tasdiqlangan Nizomga muvofiq, saralash jarayonlari quyidagi tartibda amalga oshiriladi:

Birinchi bosqich: 2025-yilning yanvar-iyun va sentabr-dekabr oylarida boʻlib oʻtgan malaka sinovlarining natijalari asosida oʻtkaziladi.

Natijalarni eʼlon qilish: Nomzodlar roʻyxati joriy yilning 1-martiga qadar shakllantiriladi. Birinchi bosqichdan muvaffaqiyatli oʻtgan pedagoglarning pedagog.uzedu.uz platformasidagi shaxsiy kabinetlariga bu haqda xabarnoma yuboriladi.

Eslatib oʻtamiz, Vazir jamgʻarmasi ustamasi eng malakali va oʻz ustida ishlaydigan pedagoglarni moddiy qoʻllab-quvvatlashga xizmat qiladi.