Abituriyentlar diqqatiga: OTMlarga ikki bosqichli qabul qanday amalga oshiriladi?

O‘zbekistonda oliy ta’lim muassasalarining bakalavriat bosqichiga qabul tizimida muhim o‘zgarishlar kuchga kirdi. Prezidentning PF-81-son Farmoniga muvofiq, bu yilgi qabul jarayonlari mutloq yangicha — “avval test, so‘ng tanlov” tamoyili asosida, ikki bosqichda tashkil etilmoqda.

Barcha ro‘yxatdan o‘tish va tanlov jarayonlari Bilimni baholash agentligining yagona my.uzbmb.uz platformasi orqali onlayn tarzda amalga oshiriladi.

1-bosqich: Ro‘yxatdan o‘tish (5-iyundan 25-iyungacha)

Abituriyentlarni onlayn ro‘yxatdan o‘tkazish joriy yilning 5-iyunidan boshlanib, 25-iyun kuni ham davom etadi. Ushbu bosqichda abituriyentlar hali universitet yoki aniq yo‘nalishni tanlamaydilar.

Oddiy test sinovlarida ishtirok etuvchilar faqat quyidagilarni belgilaydi:

• Imtihon topshiriladigan fanlar majmuasi;

• Ta’lim berish tili;

• Test topshirish o‘zi uchun qulay bo‘lgan hudud (viloyat).

Alohida iqtidor talab etiladigan (ijodiy imtihonli) yo‘nalishlarni tanlovchilar:

• Ta’lim tili va test topshirish hududi;

• Alohida iqtidor talab etiladigan muayyan ta’lim yo‘nalishi;

• Kasbiy (ijodiy) imtihon topshiriladigan muayyan oliygoh.

Eslatma: Oliy ta’lim muassasalariga kirish imtihonlari an’anaviy tarzda iyul-avgust oylarida o‘tkaziladi. Abituriyentlar o‘zlarining to‘plagan ballarini imtihon topshirgan kunining ertasigayoq bilib olishlari mumkin bo‘ladi.

2-bosqich: Oliygoh va yo‘nalish tanlash (Imtihonlardan so‘ng)

Asosiy yangilik aynan shu bosqichda: abituriyentlar barcha kirish imtihonlari to‘liq yakunlanib, o‘z ballarini aniq bilganlaridan keyin g‘alaba imkoniyatlarini hisoblab chiqishadi. Imtihonlar tugagach, 15 kun davomida my.uzbmb.uz saytida quyidagilarni tanlash imkoniyati ochiladi:

• Oliy ta’lim muassasasi (OTM);

• Bakalavriat ta’lim yo‘nalishi;

• Ta’lim shakli (kunduzgi, sirtqi, kechki, masofaviy);

• Tanlov ustuvorligi (grant yoki kontrakt ketma-ketligi).

Yakuniy natijalar qachon chiqadi? Abituriyentning talabalikka tavsiya etilgan yoki etilmagani (mandat) qabulning ikkinchi bosqichi to‘liq tugaganidan keyin bir hafta muddatda Bilimni baholash agentligining rasmiy veb-saytida e’lon qilinadi.

Texnikumlarda o‘qishni xohlovchilar uchun tartib

Oliygohlarga qabulning yakuniy natijalari (mandat) e’lon qilinganidan so‘ng, oliy ta’limga kira olmagan yoki o‘z xohishi bilan texnikumni tanlagan abituriyentlar uchun 10 kun muddat beriladi. Ular shu vaqt ichida quyidagilarni tanlashlari kerak:

• O‘zi xohlagan texnikum;

• Muayyan kasb va mutaxassislik;

• Ta’lim shakli.

Texnikumlarga qabul natijalari ham ariza topshirish muddati tugagach, bir hafta ichida agentlik saytida e’lon qilinadi.

Savollaringiz bormi? "Qabul-2026" shtabi yordamga tayyor!

Abituriyentlar va ularning ota-onalariga jarayonlarni to‘g‘ri tushunishda ko‘maklashish maqsadida Oliy ta’lim, fan va innovatsiyalar vazirligi hamda barcha oliy ta’lim tashkilotlarida maxsus “Qabul-2026” shtabi tashkil etildi.

O‘zingizni qiziqtirgan har qanday savol yuzasidan quyidagi aloqa kanallariga murojaat qilishingiz mumkin:

• 📞 1006 — Vazirlikning ishonch telefoni;

• 📞 1195 — Bilimni baholash agentligi ishonch telefoni;

• 🤖 @EduuzUniversalBot — Maxsus telegram bot.