IIV Akademiyasi magistratura bosqichiga hujjat topshirish boshlandi

O‘zbekiston Respublikasi Ichki ishlar vazirligi Akademiyasi 2026/2027-o‘quv yili uchun magistratura bosqichiga nomzodlar hujjatlarini qabul qilish boshlanganini ma’lum qiladi. Nomzodlar joriy yilning 1-aprelidan 1-iyuniga qadar magistr.akadmvd.uz portali orqali elektron ro‘yxatdan o‘tishlari lozim.

Qabul jarayonlari quyidagi uchta ixtisoslik yo‘nalishi bo‘yicha amalga oshiriladi:

1. Tashkiliy-strategik boshqaruv yo‘nalishi

Ushbu yo‘nalish yuqori bo‘g‘in rahbar kadrlarini tayyorlashga yo‘naltirilgan. Nomzodlarga qo‘yiladigan talablar:

• Ma’lumoti: Bakalavr darajasi yoki "tashkiliy-taktik boshqaruv" mutaxassisligi diplomiga tenglashtirilgan (magistratura, Oliy akademik kurslar yoki Rahbar kadrlarni tayyorlash fakulteti) ma’lumot.

• Unvoni: Kamida “podpolkovnik” maxsus unvoni.

• Lavozimi: Oxirgi bir yil davomida yuqori rahbarlik lavozimlarida (boshqarma yoki bo‘lim boshliqlari, IIB rahbarlari, jazoni ijro etish muassasalari boshliqlari va h.k.) faoliyat yuritayotgan bo‘lishi shart.

2. Tashkiliy-taktik boshqaruv yo‘nalishi

O‘rta va yuqori bo‘g‘in boshqaruv xodimlarini tayyorlash uchun mo‘ljallangan. Nomzodlarga qo‘yiladigan talablar:

• Ma’lumoti: Bakalavr yoki diplomli mutaxassis darajasi.

• Unvoni: Kamida “mayor” maxsus unvoni.

• Lavozimi: Oxirgi bir yil davomida o‘rta va yuqori bo‘g‘in lavozimlarida (bo‘linma boshliqlari, tergovchilar, bosh mutaxassislar, IIB rahbar o‘rinbosarlari va h.k.) faoliyat yuritayotgan bo‘lishi lozim.

3. Ilmiy-pedagogik faoliyat yo‘nalishi

Ushbu yo‘nalish tizim uchun ilmiy va pedagog kadrlar tayyorlashni maqsad qilgan. Nomzodlarga qo‘yiladigan talablar:

• Ma’lumoti: Oliy yuridik ma’lumot.

• Tajribasi: Ichki ishlar organlarida kamida 2 yillik xizmat staji.

Hujjat topshirish tartibi va tanlov bosqichlari

Nomzodlar hujjatlarini faqat elektron shaklda magistr.akadmvd.uz veb-sayti orqali taqdim etadilar. Ro‘yxatdan o‘tish jarayonida Akademiya boshlig‘i nomiga yozilgan va belgilangan tartibda imzolangan bildirgining skaner qilingan nusxasini yuklash talab etiladi.

Saralash jarayoni quyidagi bosqichlardan iborat:

1. Taqdim etilgan hujjatlarni o‘rganish va ko‘rib chiqish;

2. Maxsus kasbiy tanlov (yozma ish va diagnostika testlari);

3. Yakuniy yakka tartibdagi suhbat.

Magistraturaga qabul bo‘yicha qo‘shimcha ma’lumotlarni Akademiya rasmiy sayti yoki qabul komissiyasidan olishingiz mumkin.