Magistratura — 2026: Xotin-qizlar uchun imtiyozlar va to‘lov-kontrakt tartibi

Magistratura bosqichida tahsil olishni rejalashtirayotgan nomzodlar uchun joriy o‘quv yilida amal qiladigan asosiy qoidalar, xotin-qizlar uchun yaratilgan imtiyozlar hamda qo‘shimcha qabul tartiblari yuzasidan eng muhim savollarga javoblar taqdim etiladi.

1. Xotin-qizlar uchun kontrakt pullarini qoplash tartibi

Joriy yilda ham magistratura bosqichida to‘lov-kontrakt asosida o‘qishga qabul qilingan xotin-qizlarning shartnoma mablag‘lari Davlat byudjeti hisobidan to‘liq qoplab beriladi.

• Ariza topshirish muddati: 30-sentabrga qadar.

• Yangi imkoniyat: Ushbu imtiyoz endilikda nafaqat kunduzgi, balki yangi ochilgan kechki va masofaviy ta’lim shakllarida o‘qiydigan xotin-qizlar uchun ham amal qiladi.

2. Magistraturada qo‘shimcha qabul (Super-kontrakt)

Magistratura yo‘nalishlarida belgilangan kvotadan tashqari qo‘shimcha qabul jarayonlari ham mavjud. Buning bakalavriatdagi "super-kontrakt"dan farqi shundaki, to‘lov miqdori ancha arzonroq belgilangan.

• To‘lov miqdori: Qo‘shimcha qabulga kirganlar bir talabani o‘qitishning real xarajat summasini (taxminan 15–25 mln so‘m atrofida) to‘laydilar. Bakalavriatdagi kabi 5 yoki 15 baravar miqdoridagi to‘lovlar magistratura tizimida mavjud emas.

• To‘lov muddati: Real xarajat miqdoridagi kontrakt summasi o‘qishning har ikki yili uchun ham amal qiladi.

3. Qo‘shimcha qabulda grantga o‘tish imkoniyati

Qo‘shimcha qabul (real xarajatli kontrakt) asosida o‘qishga kirgan talabalar uchun grant imkoniyati yopiq emas. Agar talaba o‘quv jarayonida yuqori natijalarni qayd etsa, grant o‘rinlari qayta taqsimlanganda 2-kursdan davlat granti asosida o‘qishini davom ettirishi mumkin.

4. Qo‘shimcha qabuldagi xotin-qizlarga imtiyoz beriladimi?

Qo‘shimcha qabul (kvotadan tashqari) doirasida o‘qishga kirgan xotin-qizlarning kontrakt pullari davlat tomonidan qoplab berilmaydi. Biroq, ular grant taqsimotida ishtirok etib, grant o‘rnini egallashsa, ta’lim olishlari bepul bo‘ladi.

5. Til sertifikati bo‘yicha talablar

Qo‘shimcha qabul asosida o‘qishga kirish uchun ham nomzoddan belgilangan darajadagi xorijiy til sertifikati talab etiladi. "Keyinchalik sertifikat olish sharti bilan o‘qishga kirish" tartibi magistraturaning hech bir shakli uchun (shu jumladan qo‘shimcha qabul uchun ham) amal qilmaydi.

6. Qishki qabul jarayoni

Amaldagi tartibga ko‘ra, joriy o‘quv yilida magistratura mutaxassisliklari uchun qishki qabul jarayonlari rejalashtirilmagan.