Maktablardagi eng faol kitobxonlarga 10 million so‘mdan mukofot beriladi

Bugun Ko‘ksaroy qarorgohida O‘zbekiston Respublikasi Prezidenti Shavkat Mirziyoyevning yoshlar bilan muloqoti davom etmoqda. Tadbir doirasida yosh oilalarni ijtimoiy himoya qilish, kitobxonlik madaniyatini yuksaltirish va yoshlarning bandligini ta’minlashga qaratilgan qator muhim tashabbuslar e’lon qilindi.

Yosh oilalarni uy-joy bilan ta’minlash

Davlatimiz rahbari har yili mamlakatimizda o‘rtacha 270 mingga yaqin yangi oila tashkil etilayotganini ta’kidlab, ularning uy-joy masalasini hal etish strategik ahamiyatga ega ekanini qayd etdi.

Shu maqsadda, yosh oilalarni qo‘llab-quvvatlash uchun ipoteka dasturi doirasida kredit stavkasining 14 foizdan oshgan qismi budjet mablag‘lari hisobidan qoplab berilishi belgilandi.

Kitobxonlik va nashriyot sohasidagi islohotlar

Bugungi kundagi global axborot xurujlariga qarshi kurashishda yoshlar o‘rtasida mutolaani ommalashtirish ustuvor vazifa sifatida belgilandi. Ushbu yo‘nalishda:

• “Kitobxonlik madaniyatini rivojlantirish” jamg‘armasi orqali iste’dodli yozuvchilarga ijodiy buyurtmalar beriladi va ularga bir yil davomida har oy 20 million so‘m miqdorida haq to‘lanadi.

• Xorijiy adabiyotlarni o‘zbek tiliga hamda milliy asarlarni chet tillariga tarjima qilish va chop etish xarajatlarining 50 foizi davlat tomonidan moliyalashtiriladi.

• Yangi o‘quv yili arafasida barcha maktab va texnikumlarga eng sara 100 ta asardan iborat kitoblar to‘plami yetkaziladi.

• Maktablardagi eng faol kitobxon o‘quvchilarni rag‘batlantirish uchun 10 million so‘m miqdorida mukofot joriy etiladi.

Shuningdek, sohada tadbirkorlikni rivojlantirish uchun kitob savdosi hajmini oyiga 10 ming donadan oshirgan tadbirkorlarga 3 yil muddatga 1 milliard so‘mgacha 7 foizli ssuda ajratiladi.

Ijtimoiy moslashuv: “Ikkinchi imkon” loyihasi

Prezident jazoni ijro etish muassasalaridan ozod etilgan yoshlarning jamiyatga integratsiyalashuviga alohida e’tibor qaratdi. Ushbu toifadagi yoshlarni qo‘llab-quvvatlash maqsadida “Ikkinchi imkon” loyihasiga start beriladi.

Loyiha doirasida:

• Yoshlar 8 oydan 12 oygacha bo‘lgan intensiv kurslarda dasturlash, veb-dizayn va kompyuter muhandisligi kabi zamonaviy kasblar hamda xorijiy tillarga o‘qitiladi.

• Tizim joriy yilning 1-iyunidan boshlab Navoiy, Qashqadaryo va Toshkent viloyatlarida sinovdan o‘tkaziladi, kelasi yildan esa barcha hududlarda joriy etiladi.