O‘zbekistonda 7 ta hududda “Kasblar shaharchalari” tashkil etiladi

Prezident Shavkat Mirziyoyev tomonidan 2026-yil 16-fevral kuni “Mahallani rivojlantirish va jamiyatni yuksaltirish” yilida ustuvor yoʻnalishlar boʻyicha islohotlar dasturlari va “Oʻzbekiston – 2030” strategiyasini amalga oshirish boʻyicha davlat dasturi toʻgʻrisida”gi PF–22-son Farmoni qabul qilindi.

Mahallalarni rivojlantirish va aholi bandligini ta’minlash

Farmonga muvofiq, mahallalarni rivojlantirish bo‘yicha bir qator muhim vazifalar belgilab berildi. Xususan, mahallalarda 10 mingdan ziyod ishlab chiqarish va xizmat koʻrsatish loyihalari ishga tushiriladi. Bu orqali qoʻshimcha 100 mingta yangi ish oʻrni yaratilishi ko‘zda tutilgan. Shuningdek, mahallalar infratuzilmasini yaxshilash va ularga “Yangi Oʻzbekiston” qiyofasini olib kirish maqsadida 20 trln soʻm mablagʻ yoʻnaltiriladi.

Kasb-hunar ta’limidagi yangiliklar

Hujjat bilan kasblarni rivojlantirish boʻyicha ham ustuvor yoʻnalishlar tasdiqlandi. Unga ko‘ra:

• 2026/2027 oʻquv yilidan boshlab 7 ta hududda ilgʻor kasbiy mahorat texnikumlari negizida “Kasblar shaharchalari” faoliyati yo‘lga qo‘yiladi. Ushbu shaharchalar maktab oʻquvchilarini zamonaviy kasblarga yoʻnaltirishga xizmat qiladi.

• Yangi oʻquv yilidan boshlab texnikum o‘quvchilari uchun stipendiya toʻlash amaliyoti joriy etiladi.

• Hududlarda 24 ta malakani baholash markazi tashkil qilinadi. Mazkur markazlar bitiruvchilarga mehnat bozorida tan olinadigan maxsus sertifikatlar beradi.

Eslatib o‘tamiz, mazkur tashabbus Prezident Shavkat Mirziyoyevning 2025-yil 26-dekabrdagi Murojaatnomasida belgilangan bo‘lib, 2027-yilda “Kasblar shaharchalari” respublikaning qolgan barcha hududlarida ham tashkil etilishi rejalashtirilgan.