Prezident Farmoni: Bogʻcha va maktablarning boʻsh yer maydonlarida davlat-xususiy sheriklik shartlari asosida bogʻcha tashkil etishga ruxsat berildi hamda tarbiyachilar ish haqini qoplash bo‘yicha imtiyozlar joriy qilindi

Prezidentning 2026-yil 5-fevraldagi PF-19-sonli Farmoniga asosan, mamlakatimizda maktabgacha ta’lim qamrovini oshirish maqsadida tadbirkorlarga keng ko‘lamli imtiyozlar berilmoqda. Yangi tartib 2026-yil 1-apreldan boshlab qamrov darajasi 80 foizdan past bo‘lgan tuman va shaharlarda (Toshkent shahri mustasno) amal qiladi.

Farmonga ko‘ra, tadbirkorlar uchun ikki yo‘nalishda qo‘shimcha imkoniyatlar yaratilmoqda:

Birinchidan, mavjud davlat bog‘chalari va maktablarining bo‘sh turgan yer maydonlarida davlat-xususiy sheriklik asosida bog‘cha tashkil etishga ruxsat beriladi. Bunda tadbirkor yer uchun 30 yil davomida ijara to‘lovi to‘lamaydi. Shuningdek, har bir tarbiyalanuvchi uchun sarflanadigan xarajatning 50 foizi miqdorida davlatdan subsidiya ajratiladi. Mazkur imtiyoz 2024-yildan buyon faoliyat yuritayotgan nodavlat bog‘chalarga ham taalluqlidir.

Ikkinchidan, o‘z hududida kamida 150 o‘rinli xususiy bog‘cha qurmoqchi bo‘lgan tadbirkorlarga quyidagi yengilliklar beriladi:

• Bog‘cha qurish uchun 5 milliard so‘mgacha imtiyozli kreditlar 7 yil muddatga ajratiladi;

• Bog‘cha ish boshlaganidan so‘ng, undagi tarbiyachilarning oylik ish haqlari 3 yil davomida davlat byudjeti hisobidan to‘lab beriladi. Bunda har 30 nafar bola uchun bir nafar tarbiyachi shtati hisobga olinadi;

• Yer maydonlari hokimliklar tomonidan aholi zichligi va ehtiyojdan kelib chiqib, auksion orqali ajratiladi.

Ta’kidlash joizki, barcha subsidiya va ish haqi to‘lovlari elektron davomat tizimi asosida amalga oshiriladi. Bu chora-tadbirlar chekka hududlarda ta’lim sifatini oshirish va tadbirkorlik subyektlarini qo‘llab-quvvatlashga xizmat qiladi.