QS World University Rankings 2027 e’lon qilindi: O‘zbekistonning 6 ta oliy ta’lim muassasasi dunyoning eng nufuzli universitetlari ro‘yxatiga kiritildi
Bugun, 2026-yil 18-iyun kuni oliy ta’lim muassasalarini baholovchi dunyodagi eng obro‘li reytinglardan biri – “QS World University Rankings 2027” natijalari e’lon qilindi. Quvonarlisi, ushbu xalqaro reytingdan O‘zbekistonning 6 ta yetakchi universiteti ham joy oldi.
Mazkur reytingda global miqyosda 1500 dan ortiq oliy ta’lim muassasalari baholangan. Baholash jarayonida akademik obro‘, ish beruvchilar fikri, ilmiy tadqiqotlar sifati, xalqaro hamkorlik hamda boshqa bir qator muhim mezonlar (jami 9 ta global indikator) inobatga olingan.
O‘zbekiston universitetlarining reytingdagi ko‘rsatkichlari
Dunyoning eng kuchli universitetlari ro‘yxatiga kiritilgan mamlakatimiz OTMlari va ularning egallagan o‘rinlari quyidagicha ko‘rinish oldi:
-
“TIQXMMI” milliy tadqiqot universiteti — 458-o‘rin
-
O‘zbekiston Milliy universiteti — 801–850-o‘rinlar oralig‘ida
-
Toshkent davlat texnika universiteti — 1001–1200-o‘rinlar oralig‘ida
-
Samarqand davlat universiteti — 1001–1200-o‘rinlar oralig‘ida
-
Toshkent davlat iqtisodiyot universiteti — 1201–1400-o‘rinlar oralig‘ida
-
Toshkent davlat transport universiteti — 1201–1400-o‘rinlar oralig‘ida
Dunyo reytingida peshqadamlar kimlar?
Reytingda AQSHning mashhur Massachusets texnologiya instituti (MIT) 100 ballik maksimal natija bilan ketma-ket 15-yil davomida birinchi o‘rinni hech kimga bermay kelmoqda. Kuchli beshlik esa quyidagicha shakllangan:
-
1-o‘rin: Massachusetts Institute of Technology (MIT) – AQSH
-
2-o‘rin: Imperial College London (Buyuk Britaniya) va Stanford University (AQSH)
-
4-o‘rin: University of Oxford – Buyuk Britaniya
-
5-o‘rin: Harvard University – AQSH
Ma’lumot o‘rnida
“QS World University Rankings” – 2004-yildan buyon har yili e’lon qilib kelinayotgan va xalqaro miqyosda oliy ta’lim sifatini belgilab beruvchi eng nufuzli reyting tizimlaridan biri hisoblanadi.
Eslatib o‘tamiz, bugungi kunda O‘zbekistonda oliy ta’lim tizimi qamrovi kengayib bormoqda. 2025/2026-o‘quv yili boshiga kelib, respublikamizda 215 ta oliy ta’lim tashkiloti faoliyat yuritmoqda. Ularda 1,5 milliondan ortiq talaba tahsil olayotgan bo‘lsa, yoshlarga ilm berayotgan professor-o‘qituvchilar soni 54,9 ming nafardan oshgan. Mamlakatimiz universitetlarining nufuzli xalqaro reytinglarga kirishi o‘zbek ta’lim tizimining jahon hamjamiyatida tan olinayotganidan dalolatdir.