Xushxabar: Pedagoglar farzandlari uchun OTM kontraktiga 30% chegirma berilishi kutilmoqda
Muhokamalar portaliga (regulation.gov.uz) yangi qaror loyihasi joylashtirildi. Unga ko‘ra, pedagog xodimlarning farzandlari uchun davlat oliy ta’lim muassasalarida o‘qish uchun maxsus imtiyoz joriy etiladi.
Asosiy o‘zgarishlar nimalardan iborat?
1. Chegirma miqdori va muddati: 2026-2027-o‘quv yilidan boshlab, davlat OTMlariga o‘qishga kirgan va tahsil olayotgan pedagoglarning farzandlariga to‘lov-kontrakt summasining 30 foizi miqdorida chegirma beriladi.
2. Qanday kontraktlar uchun amal qiladi? Imtiyoz faqatgina bazaviy to‘lov-kontrakt summasiga nisbatan qo‘llaniladi. Muhim jihati shundaki, "super-kontrakt" (oshirilgan va tabaqalashtirilgan kontrakt) asosida o‘qiydiganlar uchun bu chegirma amal qilmaydi.
3. Arizani qanday topshirish kerak? Talabgorlar ortiqcha hujjatbozliksiz, masofadan turib ariza yuborishlari mumkin:
-
kontrakt.edu.uz (Talabalarga shartnoma asosida ko‘rsatiladigan xizmatlar hisobini yuritish axborot tizimi) orqali onlayn murojaat qilinadi.
-
Ariza OTM rektori yoki filial direktori nomiga yuboriladi.
-
Chegirma har o‘quv yili uchun bir marotaba qo‘llaniladi.
Mablag‘lar qayerdan ajratiladi?
Pedagoglar farzandlari uchun chegirma bilan bog‘liq xarajatlar Oliy ta’lim, fan va innovatsiyalar vazirligiga ajratilgan davlat budjeti mablag‘lari hisobidan qoplanadi.
Eslatib o‘tamiz, ushbu hujjat hozirda loyiha bosqichida va jamoatchilik muhokamasidan o‘tmoqda.