Xalqaro fan olimpiadalari g‘oliblari magistraturaga qo‘shimcha davlat granti asosida qabul qilinadi

Vazirlar Mahkamasining oliy taʼlim muassasalari talabalarini respublika va xalqaro fan olimpiadalariga keng jalb qilish hamda iqtidorli yoshlarni qo‘llab-quvvatlashga qaratilgan qarori loyihasi muhokamaga qo‘yildi.

Ushbu hujjat bilan iqtidorli talabalar uchun qator yangi imkoniyatlar va saralashning shaffof tizimi joriy etilmoqda.

G‘oliblar uchun asosiy imtiyoz

Eng muhim yangiliklardan biri — xalqaro fan olimpiadalarida g‘oliblikni (oltin, kumush, bronza medallari) qo‘lga kiritgan talabalar o‘z yo‘nalishiga mos mutaxassislik bo‘yicha magistraturaga qo‘shimcha davlat granti asosida imtihonsiz qabul qilinadi.

2027-yildan yangi xalqaro olimpiadalar

Oliy taʼlim, fan va innovatsiyalar vazirligi tomonidan 2027-yildan boshlab O‘zbekistonda talabalar o‘rtasida Kimyo va Biologiya fanlaridan xalqaro fan olimpiadalari tashkil etilishi rejalashtirilmoqda.

Terma jamoaga saralash qanday o‘tkaziladi?

Xalqaro maydonda O‘zbekiston sharafini himoya qiladigan terma jamoa a’zolari 3 bosqichli qat’iy saralash orqali aniqlanadi:

1. Birinchi bosqich: Respublika fan olimpiadasida 1-10 o‘rinni olganlar, avvalgi xalqaro olimpiada g‘oliblari va ishtirokchilari qatnashadi. Undan har bir fan bo‘yicha eng yuqori ball to‘plagan 25 nafar talaba o‘tadi.

2. Ikkinchi bosqich: Bu bosqichdan so‘ng har bir fan (Matematika, Fizika, Informatika, Kimyo, Biologiya) bo‘yicha 12 nafardan eng kuchli talaba saralab olinadi.

3. Uchinchi bosqich: Saralangan 12 nafar talaba uchun maxsus mahorat darslari va o‘quv mashg‘ulotlari tashkil etiladi. Yakuniy sinovlar natijasiga ko‘ra xalqaro kvotalar asosida O‘zbekiston terma jamoasi tarkibi shakllantiriladi.

Muhim jihati: Saralashda talabaning nechanchi kursda o‘qishi ahamiyatga ega emas — barchaga bir xil nazorat materiallari beriladi va natijalar umumiy hisoblanadi.

Moliyalashtirish va qo‘llab-quvvatlash

• Xarajatlar qoplanishi: OTMlarga o‘z talabalarining xalqaro olimpiadalardagi ishtiroki bilan bog‘liq barcha xarajatlarni (yo‘l kira, yashash va h.k.) byudjetdan tashqari mablag‘lar hisobidan qoplash huquqi beriladi.

• Professional tayyorgarlik: Terma jamoalarni tayyorlash uchun tajribali trenerlar, professorlar va xorijiy mutaxassislardan iborat Maslahat kengashlari tuziladi.

• Malakali rahbarlar: Terma jamoa rahbarlari nafaqat kuchli mutaxassis, balki ingliz tilidagi topshiriqlarni ona tiliga mahorat bilan tarjima qila oladigan va hakamlar oldida talabalar ishini himoya qila oladigan kadrlar bo‘lishi shart.

Tan olinadigan xalqaro olimpiadalar ro‘yxati