O‘quvchilar o‘rtasida ‘‘Turon’’ maktab teatri va ‘‘Iqtidor’’ maktab ansambli tanlovlari o‘tkazilish tartibi

O‘zbekiston Respublikasi Maktabgacha va maktab ta’limi vazirligi hamda Madaniyat vazirligining 2026-yil 10-fevraldagi qo‘shma qarori bilan o‘quvchi-yoshlarning madaniy-ma’rifiy saviyasini oshirishga qaratilgan ikki yirik loyiha — “Turon” maktab teatri hamda “Iqtidor” maktab ansambli respublika tanlovlarini o‘tkazish tartibi tasdiqlandi.

Mazkur tanlovlar o‘quvchilarning ijodiy salohiyatini ro‘yobga chiqarish va milliy qadriyatlarni targ‘ib qilish maqsadida har yili an’anaviy tarzda tashkil etiladi.

“Turon” maktab teatri: Sahna mahorati va ma’naviyat

Tanlovda davlat va nodavlat umumta’lim maktablarining 6–10-sinf o‘quvchilaridan tarkib topgan (8 nafargacha) jamoalar ishtirok etadi. Saralash jarayonlari quyidagi bosqichlarda amalga oshiriladi:

• Tuman (shahar) bosqichi: Har yili mart oyida maktablararo bellashuvlar shaklida o‘tkaziladi.

• Hududiy bosqich: Aprel oyida tuman g‘oliblari o‘rtasida tashkil etiladi. Ishtirokchilar “Bizning maktab” (tanishtiruv) hamda “Teatr – ibratxona” (sahna spektakli) shartlari bo‘yicha baholanadi.

• Respublika bosqichi: Iyun oyida yakuniy final bosqichi bo‘lib o‘tadi.

“Iqtidor” maktab ansambli: Musiqiy san’at targ‘iboti

Ushbu tanlov ham 6–10-sinf o‘quvchilari o‘rtasida jamoaviy tarzda o‘tkazilib, quyidagi muddatlarda tashkil etiladi:

• Tuman bosqichi: Aprel oyida bolalar musiqa va san’at maktablarida;

• Hududiy bosqich: May oyida viloyat teatr va konsert zallarida;

• Respublika bosqichi: Iyun oyida o‘tkaziladi.

Rag‘batlantirish va g‘oliblarni taqdirlash

Tanlov g‘oliblari uchun munosib moddiy va ma’naviy rag‘batlantirish choralari belgilangan:

• Tuman va hududiy bosqich g‘oliblariga diplom, maxsus statuetka va esdalik sovg‘alari topshiriladi.

• Respublika bosqichida 2 va 3-o‘rinni egallagan jamoalar tahsil olayotgan maktablar uchun zamonaviy interaktiv doskalar taqdim etiladi.

• Tanlovning mutloq g‘olibi bo‘lgan jamoa a’zolari (1-o‘rin) xorijiy mamlakatga ta’lim sayohati yo‘llanmasi bilan mukofotlanadi.

Shaffoflikni ta’minlash va apellyatsiya tartibi

Natijalardan norozi bo‘lgan ishtirokchilar uchun adolatli appelyatsiya tizimi joriy etildi. Norozilik arizalari tanlov yakunlangandan so‘ng 15 daqiqa ichida taqdim etilishi lozim. 3 kishidan iborat komissiya shikoyatni 1 soat ichida ko‘rib chiqadi va yakuniy qarorni e’lon qiladi.

Eslatib o‘tamiz, tanlov o‘tkaziladigan aniq sana va manzillar haqida ishtirokchilar kamida 10 kun oldin xabardor qilinadi.