"Qishki perevod" natijasini kutayotgan talabalar diqqatiga: Natija chiqquncha nima qilish kerak?
Oliy ta’lim, fan va innovatsiyalar vazirligi tartibiga koʻra, joriy yilda uzrli sabablarga koʻra oʻqishni koʻchirish (qishki perevod) uchun topshirilgan arizalar natijasi 10-fevralga qadar e’lon qilinishi belgilangan.
Koʻpchilik talabalarni bir savol qiynamoqda: “Hali javob chiqmagan boʻlsa, darsga borishim shartmi?” Quyida ushbu jarayonda talaba amal qilishi kerak boʻlgan muhim tavsiyalarni taqdim etamiz.
1. Oʻqishni odatdagidek davom ettiring
"Hujjat topshirdim, baribir ketaman" degan oʻy bilan darslarni qoldirish — eng katta xatolardan biri. Talaba oʻqishni koʻchirish boʻyicha rasmiy buyruq chiqquniga qadar oʻzi tahsil olayotgan oliygohning amaldagi talabasi hisoblanadi.
-
Darslarda ishtirok eting: Sababsiz qoldirilgan darslar (n/b) yakunda talabalar safidan chetlatilishga sabab boʻlishi mumkin.
-
Nazoratlarni topshiring: Oraliq va yakuniy nazorat ishlaridan oʻtavering. Agar koʻchirish amalga oshmasa, bu baholar sizga joriy oliygohda kerak boʻladi.
2. Kontrakt toʻlovi: Shoshilmang, lekin qarzdor boʻlmang
Mablagʻ masalasida talabalar ikki narsaga e’tibor qaratishlari lozim:
-
Eski qarzdorlik: Birinchi yarim yillik uchun belgilangan kontrakt toʻlovidan qarzdorligingiz boʻlsa, uni albatta yopishingiz kerak. Aks holda, hujjatlaringizni koʻchirishda muammolar yuzaga kelishi mumkin.
-
Ikkinchi yarim yillik: Ikkinchi semestr uchun toʻlovni amalga oshirishga shoshilmay turish tavsiya etiladi. Sababi, oʻqishingiz koʻchirilgan taqdirda, ikkinchi yarim yillik kontraktini yangi oliygohga toʻlashingiz kerak boʻladi.
3. Natijalarni qayerdan bilish mumkin?
Arizangiz holatini muntazam ravishda transfer.edu.uz platformasidagi shaxsiy kabinetingiz orqali kuzatib boring. 10-fevralga qadar natijangiz "tavsiya etildi" yoki "rad etildi" maqomiga oʻzgaradi.
Muhim eslatma: Oʻqishni koʻchirish boʻyicha ijobiy javob olganingizdan soʻnggina, joriy oliygohingizga ariza bilan murojaat qilib, hujjatlaringizni qaytarib olishingiz va yangi dargohda oʻqishni boshlashingiz mumkin.