Rasmiy: Maktab bitiruvchilarining milliy va xalqaro sertifikatlari yakuniy imtihonlarda qanday inobatga olinadi?
Maktabgacha va maktab ta’limi vazirligining 2026-yil 16-martdagi 102-sonli buyrug‘i bilan umumta’lim fanlari hamda xorijiy tillarni bilish darajasini baholovchi milliy va xalqaro tan olingan sertifikatlar ro‘yxati tasdiqlandi.
Mazkur hujjatga ko‘ra, belgilangan talablarga javob beruvchi sertifikatga ega o‘quvchilar tegishli fan bo‘yicha yakuniy imtihonlardan ozod etiladi va ularga imtiyozli ballar beriladi.
Xorijiy til sertifikatlari bo‘yicha imtiyozlar
Amaldagi tartibga ko‘ra (Adliya vazirligi, 29.05.2024, №3515), quyidagi darajadagi sertifikatga ega o‘quvchilar xorijiy til imtihonidan ozod etiladi:
-
B1 va undan yuqori darajadagi milliy yoki xalqaro sertifikat egalariga yakuniy imtihondan avtomatik ravishda 5 (a’lo) baho qo‘yiladi.
Umumta’lim fanlari bo‘yicha baholash mezonlari
Umumta’lim fanlaridan sertifikati bor o‘quvchilar uchun baholash quyidagi tabaqalashgan tartibda amalga oshiriladi:
1. Milliy sertifikat natijalari bo‘yicha:
-
5 (a’lo) baho: A va A+ darajalari uchun;
-
4 (yaxshi) baho: B va B+ darajalari uchun;
-
3 (qoniqarli) baho: C va C+ darajalari uchun.
2. Xalqaro sertifikat (A Level) natijalari bo‘yicha:
-
5 (a’lo) baho: A*, A yoki B darajalari uchun;
-
4 (yaxshi) baho: C darajasi uchun;
-
3 (qoniqarli) baho: D yoki E darajalari uchun.
Muhim cheklovlar va muddatlar
-
Amal qilish muddati: Agar sertifikatning amal qilish muddati belgilanmagan bo‘lsa, u olingan kundan boshlab 3 yil davomida imtiyoz berish huquqiga ega bo‘ladi.
-
Masofaviy sertifikatlar o‘tmaydi: Rasmiy test markazlariga bormasdan, masofadan turib olingan (Remote, Home Edition va boshqa) sertifikatlar yakuniy imtihonlar uchun tan olinmaydi. Imtihonlar bevosita vakolatli tashkilot nazorati ostida topshirilgan bo‘lishi shart.
Ushbu tartib o‘quvchilarning bilim darajasini xalqaro standartlar asosida adolatli baholash va ularning intilishlarini rag‘batlantirish maqsadida joriy etilmoqda.
