Talabalarning startap loyihalari uchun 10 ta oliygohga 50 milliard so‘m beriladi
Prezident Shavkat Mirziyoyev madaniyat va san’at sohasi xodimlari bilan uchrashuv o‘tkazdi. Unda sohada kadrlar tayyorlash tizimini tubdan yangilash, yosh iste’dodlarni qo‘llab-quvvatlash va ijodiy mahsulotlarni tijoratlashtirish bo‘yicha qator muhim tashabbuslar e’lon qilindi.
Talabalar startaplariga — 50 milliard so‘m
Yangi tizimga ko‘ra, madaniyat va san’at yo‘nalishidagi 10 ta oliygoh rektori endilikda har bir talaba bilan individual tartibda ishlashi belgilandi. Rektorlar yoshlarning shaxsiy brendini yaratish, ularning ijodiy mahsulotlarini sotish va bozor topish, shuningdek, nufuzli hamkorlar jalb qilishga shaxsan mas’ul bo‘ladi.
Eng muhim yangiliklardan biri — talabalarning istiqbolli startap loyihalarini moliyalashtirish uchun ushbu 10 ta oliygohga jami 50 milliard so‘m mablag‘ ajratiladigan bo‘ldi.
Ustoz-shogird tizimi yangi bosqichda: Dual ta’lim va 50% ustama
Yangi o‘quv yilidan boshlab tizimda tub burilish yasaladi va har bir talabaga mamlakatimizning taniqli ijodkorlari biriktirilib, dual ta’lim yo‘lga qo‘yiladi. Ustoz san’atkorlar yosh ijodkorlarni o‘zlarining konsert, teatr va ommaviy tomoshalariga jalb qilgan holda, ularni to‘g‘ridan-to‘g‘ri katta sahnaga tayyorlab boradi.
Bu jarayon ustozlar uchun ham moddiy jihatdan jozibador etib belgilanmoqda:
-
Talabalarga amaliyotda ustozlik qiladigan ijodkorlarga oliygoh professor-o‘qituvchilariga teng miqdorda haq to‘lanadi.
-
Taniqli ijodkorlar oliygohning o‘zida dars beradigan bo‘lsa, ularning oylik maoshiga 50 foiz ustama qo‘shiladi.
Zamonaviy yo‘nalishlar va xorijlik mutaxassislar
Zamon talablaridan kelib chiqib, yangi o‘quv yilidan boshlab ta’lim dasturlariga mutlaqo yangi va zamonaviy fanlar kiritiladi. Endilikda talabalar “Art-menejment”, “Kreativ industriya” va “Loyihalarni tijoratlashtirish” kabi yo‘nalishlarni chuqur o‘rganishadi.
Soha rivojini xalqaro andozalarga moslashtirish uchun kinoindustriya, moda va dizayn, madaniyat menejmenti kabi yo‘nalishlarda dars berish uchun xorijdan 50 nafar tajribali mutaxassis va professor-o‘qituvchilar taklif etiladi.
Yangi Malaka oshirish instituti tashkil etiladi
Hozirgi kunda madaniyat va san’at sohasi xodimlarining malakasini oshirish bo‘yicha yaxlit tizim mavjud emasligi sababli yangi qaror qabul qilindi. Davlat konservatoriyasi huzuridagi markaz hamda San’at va madaniyat institutidagi markaz o‘zaro birlashtiriladi.
Ularning negizida Madaniyat vazirligi huzuridagi soha xodimlarining malakasini oshirish va qayta tayyorlash instituti tashkil etilishi ma’lum qilindi. Bu institut sohadagi boshqaruv xodimlari va mutaxassislarning kasbiy mahoratini doimiy ravishda yuksaltirib borishga xizmat qiladi.